ကချင်လူမျိုး
••••••••••••
ကချင်တို့၏ နေထိုင်ရာ
ကချင်ပြည်နယ်မှာ။
ပုဆိုး ဘောင်းဘီ တိုက်ပုံ ရှပ်
ခေါင်းပေါင်းအမြိတ် လက်ယာမှတ်၊
ဓားနှင့်လွယ်အိတ် လွယ်လျက်ပါ
အမျိုးသားတို့ ဝတ်ဆင်ရာ။
ဂျပ်ခုတ်ထည်တွင် အပွင့်ရက်
ဒင်္ဂါး ငွေမောင်း စီလို့ဆက်၊
ကချင်အမျိုးသမီး ဝတ်ဆင်တာ
အားလုံးမှတ်ကြပါ။
ဗုဒ္ဓ ခရစ်ယာန် နတ်ကိုကိုး
သူတို့ယုံတာ ဤသုံမျိုး။ ။
ကယားလူမျိုး
••••••••••••••
တိုင်းရင်းသားလေး ရွှေကယား
ကယားပြည်နယ် နှံ့အပြား။
ခေါင်းပေါင်းဖြူ.နှင့် ရှပ်အင်္ကျီ
တိုက်ပုံရင်စေ့ ဝတ်ဆင်သည်၊
ဒူးအောက်ထိရှည်သော ဘောင်းဘီများ
ငွေဓားမြောင် ဓားလွယ်သိုင်းလို့ထား။
ဆံထုံးမြင့်မြင့် ထုံးလို့သာ
အနီရောင်ခေါင်းပေါင်းလေးနဲ့ပါ၊
နက်ရောင်စလွယ် လက်ပြတ်များ
အနီရောင်ခြုံထည် လွှမ်းလို့ထား၊
ပုဝါရှည်ဖြူ ခေါင်းစည်းရယ်
နီနက် ထဘီကွယ်။
ဗုဒ္ဓ နတ်နှင့် ခရစ်ယာန်များ
သူတို့ကိုးကွယ်ထား။ ။
ကရင်လူမျိုး
•••••••••••••
ကရင်ပြည်နှင့် ဧရာဝတီ
ကရင်တို့နေသည်။
အမျိုးသားတို့ ခေါင်းစည်းနည်း
လက်ယာအမြိတ် တစ်ဖက်ချစည်း၊
သင်တိုင်း ရှပ်နှင့် ပုဆိုး ဘောင်းဘီ
ရင်ကွဲသင်တိုင်း ခေါင်းစွပ်သည်၊
ရိုးရာပုဆိုး ကန့်လန့်စင်း
အလယ်မှာအမြိတ် ကန့်လန့်ခင်း။
အင်္ကျီသင်တိုင်း ထဘီဟာ
ကရင်မလေး ဝတ်စရာ၊
အမြိတ်နှစ်ဖက် ရှေ့သို့ချ
ခေါင်းစည်းပဝါ အလွန်လှ။
ဗုဒ္ဓ ခရစ်ယာန် ကိုးကွယ်အများ
နတ်ပူဇော်လို့ ပသထား။ ။
ချင်းလူမျိုး
••••••••••
ချင်းလို့ခေါ်တဲ့ တိုင်းရင်းသား
ချင်းတို့ပြည်နယ် အနှံ့အပြား။
ဘောင်းဘီ ရှပ်နှင့် ရောင်စုံစောင်
ချင်းအမျိုးသားတို့ ပွဲလမ်းဆောင်၊
ကန့်လန့်ဖော် အနက်စင်း
ခေါင်းပေါင်း ပေါင်းတဲ့ချင်း။
အမျိုးသမီး ထဘီကို
ခြေမျက်စိဖုံး ဝတ်တယ်ဆို၊
ကန့်လန့်စင်းနှင့် မှန်ကူကွက်
ပန်းပွင့်ပန်းပြောက် ထဘီကွဲ့၊
အင်္ကျီရင်စေ့ လက်တိုကို
အနားအကွက်ဆင် ခြယ်ထားလို၊
ခါးတွင် ငွေကြေးနန်းကြိုးများ
အပြားသဏ္ဍာန် သီဝတ်ထား၊
ပိုးထည်စောင်လေး လှလိုက်တာ
ပွဲတော်ရက်မှာ ခြုံဖို့ပါ။
ဗုဒ္ဓ ခရစ်ယာန် ကိုးကွယ်အများ
နတ်ပူဇော်လို့ ပသထား။ ။
ဗမာလူမျိုး
•••••••••••
စစ်ကိုင်း ပဲခူး တနင်္သာရီ
မကွေး ရန်ကုန် ဧရာဝတီ
မန္တလေးလည်း ပါတယ်ဗျ
တို့ဗမာတွေ နေထိုင်ကြ။
ရှပ်လည်ကတုံး ပုဆိုး တိုက်ပုံ
ခေါင်းပေါင်းညာချ အမျိုးသားပုံ။
ရင်ဖုံးအင်္ကျီ ထဘီဖြင့်
ဆံထုံးထုံးလို့ ပဝါဆင့်၊
ဗမာမလေး ဝတ်ဆင်တာ
သေချာမှတ်ထားပါ။
မြတ်ဗုဒ္ဓသာ ကိုးကွယ်ကြ
ဗမာတို့အလှ။ ။
. မွန်လူမျိုး
•••••••••
ပဲခူးတိုင်းနှင့် မွန်ပြည်နယ်
မွန်တို့နေပါတယ်။
ပုဆိုး တိုက်ပုံ လည်ကတုံးရှပ်
မွန်အမျိုးသားတို့ ဝတ်တာမှတ်။
ရင်စေ့အင်္ကျီထဘီဟာ
ဘီးဆံထုံးနှင့် အမျိုးသမီးပါ။
ဗုဒ္ဓဘာသာ ကိုးကွယ်ကြ
မွန်လူမျိုးတို့အလှ။ ။
ရခိုင်လူမျိုး
•••••••••••
ရခိုင်ပြည်နယ် အနှံ့အပြား
ရခိုင်တို့ နေထိုင်ထား။
ရခိုင်ပုဆိုးနှင့် တိုက်ပုံမှာ
ရှပ်လည်ကတုံး ပါသေးတာ၊
အုပ်ပေါင်း အဆင်သင့်ပြုလုပ်ထား
ခေါင်းပေါင်း ညာချမှတ်ပါဗျား။
ဆံထုံးကလေး ထုံးလို့သာ
ရင်ဖုံးရင်စေ့အင်္ကျီပါ၊
ကန့်လန့်စင်းပါ ချိတ်ထဘီများ
ဘယ်ပခုံး ပဝါစလွယ်သိုင်းထား။
ဗုဒ္ဓဘာသာ ကိုးကွယ်ကြ
ရခိုင်မှတ်ပါဗျ ။ ။
ရှမ်းလူမျိုး
••••••••••
တောင်ပေါ်က ရှမ်းကလေး
ရှမ်းပြည်နယ်မှာမွေး။
ပင်နီတိုက်ပုံ ရှပ်အင်္ကျီတွင်
ဘောင်းဘီပွပွ ပင်နီဖျင်၊
ခေါင်းပေါင်းကလေး ပေါင်းကထား
အဲဒါရှမ်းအမျိုးသား။
ထဘီ အင်္ကျီဝတ်ဆင်ကာ
ခေါင်းပေါင်းပေါင်းတဲ့ အမျိုးသမီးပါ။
ဗုဒ္ဓဘာသာ ကိုးကွယ်အများ
ရှမ်းလို့မှတ်ကာထား။ ။
Credit
