၁၀ တန်း အပ်ရမယ့်ကလေးက ကျောင်းမတက်တော့ဘဲ ကျောင်းတက်တဲ့သူတွေကို အပြစ်မြင်နေတာကြာပြီ။ အဲဒီကလေး ဦးဆောင်ပြီး လာ-တ်သွားတာတဲ့။
အ-တ်ခံရတဲ့ဆရာမရဲ့တပည့်ထဲက တစ်ယောက်ပဲ။ သူနဲ့ မိန်းကလေးတစ်ယောက်၊ PDF ကောင်လေးတစ်ယောက်ပါတယ်။ ကိုယ့်ဆရာမကိုတောင် -တ်ရဲတယ်ဆိုတော့ မကောင်းတော့ဘူးပေ့ါ ” ဟု အခင်းဖြစ်စဉ်ကို သေချာစွာမြင်တွေ့ခဲ့ရသည့် မြောက်ဥက္ကလာ(ဃ)ရပ်ကွက်တွင် နေထိုင်သူတစ်ဦးက NP News ကို ပြောသည်။
လုပ်ကြံ-တ်ဖြတ်ခံရသည့် ကျောင်းဆရာမမှာ ခင်ပွန်းဖြစ်သူ ဆုံးပါးသွားသည့်အတွက် ကျန်ရစ်ခဲ့သော သမီးလေးတစ်ဦးကို မိခင်ကောင်းပီပီ၊ ဆရာမကောင်းပီပီ ရှာဖွေလုပ်ကိုင်ကျွေးမွေးနေသူ ဖြစ်ကြောင်း အထက(၂) အရှေ့ဒဂုံမှ ဆရာမအချို့က ပြောသည်။
ကနဦးပိုင်းတွင် CDM လုပ်ခဲ့သော်လည်း ထောက်ပံ့သူမရှိ၊ ကူညီသူမရှိသည်မှာ ကြာမြင့်လာသည့်အတွက် သားအမိနှစ်ဦး၏ စားဝတ်နေရေးအတွက် မူလတာဝန်ကို ပြန်လည်ထမ်းဆောင်ရန်ဆုံးဖြတ်ခဲ့ရကြောင်း၊ အဆိုပါဆုံးဖြတ်ချက်နှင့်အတူ ဆရာမအား ဝိုင်းဝန်းအပြစ်တင်ရှုတ်ချ ခြိမ်းခြောက်မှုများပင်ရှိခဲ့ကြောင်း သိရသည်။
“ ဆရာမကို -တ်လိုက်တော့ သမီးလေးတစ်ယောက်ပဲ ကျန်ခဲ့တာပေ့ါ။ ဘယ်သူက တာဝန်ယူစောင့်ရှောက်တော့မှာလဲ။ -တ်တဲ့ကလေးကလည်း ဒီရပ်ကွက်ထဲကပဲ ” ဟု ရပ်ကွက်နေပြည်သူတစ်ဦးက အမည်မဖော်ရဲစွာဖြင့် NP News ကို ပြောသည်။
တက္ကစီယာဉ်ပေါ်၌ အနီးကပ်ပစ်-တ်ခြင်းခံခဲ့ရသော ဆရာမကို မြောက်ဥက္ကလာဆေးရုံသို့ အချိန်မီပို့ဆောင်ခဲ့သော်လည်း ရရှိထားသည့်ဒဏ်ရာဖြင့် ဆေးရုံမရောက်မီမှာပင် ကွယ်လွန်ဆုံးပါးသွားခဲ့ရကြောင်း၊ ဆရာမ၏သမီးဖြစ်သူမှာလည်း ခိုကိုးရာမဲ့စွာကျန်ရစ်ခဲ့ရပြီဖြစ်ကြောင်းလည်း သတင်းရင်းမြစ်က ဆိုသည်။
“ ဒီအကြောင်းကြားတော့ ကျွန်မတို့လည်း တော်တော်လေး လန့်နေမိတယ်။ ကျောင်းရောက်တာတောင် ဆရာမဝတ်စုံကို မဝတ်ရဲဘူး။ ကျောင်းပြန်စဖွင့်ကတည်းက ကျောင်းတက်ကျောင်းဆင်းချိန်တိုင်းမှာ အနားကလူတွေက ကြည့်တဲ့ပုံစံက တစ်မျိုးပဲ။ ကျောင်းမှာလည်း လုံခြုံရေးအစောင့်အကြပ်တွေ မရှိတော့ဘူး။ ပထမတစ်ခေါက်ဖွင့်တုန်းကမှ လုံခြုံရေးတွေရှိသေးတယ် ” ဟု ဒဂုံအရှေ့အထက(၂)မှ ဆရာမတစ်ဦးက ပြောသည်။ အွန်လိုင်းပေါ်မှာ ဆဲဆိုအပြစ်တင်နေမှုများကို ခံနိုင်ရည်ရှိစွာ တိုင်းပြည်အတွက်တာဝန်ထမ်းဆောင်လိုသော်လည်း အသက်အန္တရာယ်နှင့်ရင်ဆိုင်ရပါက ကာကယ်ပေးနိုင်မှု ကင်းမဲ့နေခြင်းကို စိတ်ပျက်လာနေကြောင်းနှင့် ယခုအတိုင်းဆက်သွားပါက အလုပ်ထွက်ရန်သာ စဉ်းစားရမည့်သဘောမျိုးဖြစ်နေကြောင်း ၎င်းကဆိုသည်။
ကျောင်းဆရာမအား တက္ကစီယာဉ်ပေါ်တွင် အနီးကပ်ပစ်သတ်သွားသော လူငယ်သုံးဦးကိုမူ ဖြစ်စဉ်ဖြစ်ပွားပြီးသည့်နောက် နာရီပိုင်းအတွင်းမှာပင် ရဲတပ်ဖွဲ့ဘက်က ရပ်ကွက်နေပြည်သူများ၏ အကူအညီကြောင့်သာ ဖမ်းဆီးနိုင်ခဲ့ပြီဖြစ်ကြောင်းလည်း သိရသည်။ လက်ရှိအချိန်တွင် ဖမ်းဆီးထားသော လူငယ်သုံးဦးကို အသေးစိတ်စစ်ဆေးမေးမြန်းမှုများလုပ်ဆောင်နေပြီဖြစ်ပြီး လိုအပ်သောအရေးယူမှုများ လုပ်ဆောင်မည်ဖြစ်ကြောင်းလည်း အကြမ်းဖျင်းကြားသိရသည်
Source:NP
