မိုးတိမ် (NP News) -ဇန်နဝါရီ ၂၅
ကမ္ဘောဒီယားဝန်ကြီးချုပ် ဟွန်ဆန်နဲ့
မြန်မာ နစက ဥက္ကဋ္ဌ ဗိုလ်ချုပ်မှူးကြီး
မင်းအောင်လှိုင်တို့ဟာ ဇန်နဝါရီ(၂၆)
ရက် ဗုဒ္ဓဟူးနေ့မှာ ဗီဒီယို Call နဲ့
တွေ့ဆုံဆွေးနွေးမှု လုပ်ဆောင်သွား
တော့မှာဖြစ်တယ်လို့ စီအန်အေက
ရေးသား ဖော်ပြလိုက်ပါတယ်။
ဗိုလ်ချုပ်မှူးကြီး မင်းအောင်လှိုင်နဲ့ ကမ္ဘောဒီယားဝန်ကြီးချုပ် ဟွန်ဆန်တို့ရဲ့အွန်လိုင်းကနေ တွေ့ဆုံစကားပြောမယ့် အစီအစဉ်ဟာ အဓိကအကြောင်းအရာအဖြစ် အာဆီယံထိပ်သီးအစည်းအဝေးတွေကို မြန်မာက အစိုးရခေါင်းဆောင်တွေ တက်ရောက်ခွင့်နဲ့ သက်ဆိုင်တယ်လို့လည်း သိရပါတယ်။ အထူးသဖြင့် ကမ္ဘောဒီးယားဝန်ကြီးချုပ်က အာဆီယံအလှည့်ကျဥက္ကဋ္ဌတာဝန်ထမ်းဆောင်စဉ်အတွင်းမှာ အိမ်ရှင်ကောင်းပီသစွာနဲ့ မြန်မာခေါင်းဆောင်ကို ဖိတ်ကြားဖို့ ပြင်ဆင်ဆုံးဖြတ်ထားပေမယ့် အာဆီယံဒေသတွင်းနိုင်ငံတွေထဲက မလေးရှား၊ အင်ဒိုနီးရှား၊ စင်ကာပူလိုနိုင်ငံတွေက ကန့်ကွက်မှုတွေ လုပ်ဆောင်နေတဲ့အတွက် ကမ္ဘောဒီးယားဝန်ကြီးချုပ်ကိုယ်တိုင် စဉ်းစားဆုံးဖြတ်ရတာ ခက်ခဲလာတဲ့သဘောမျိုးလည်း ဖြစ်ပါတယ်။ ဒါကြောင့် နှစ်ဦးသား အွန်လိုင်းကနေ တွေ့ဆုံစကားပြောပြီး ခိုင်မာတဲ့ကတိကဝတ်တွေတည်ဆောက်ဖို့ ရည်ရွယ်ထားပုံ ရပါတယ်။ စင်ကာပူသတင်းဌာန စီအန်အေရဲ့ဖော်ပြချက်မှာတော့ မြန်မာ နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်နဲ့ လူချင်းတွေ့ဆုံထားပြီးသည့်တိုင် နောက်ထပ်တစ်ခေါက်အဖြစ် အွန်လိုင်းကနေ ဗီဒီယို Call ပြောသွားမယ်လို့ ဟွန်ဆန်ကိုယ်တိုင်က ထပ်လောင်း အသိပေးလိုက်တာဖြစ်ပါတယ်။ “ အာဆီယံထိပ်သီးအစည်းအဝေးတွေကို တက်ဖို့အတွက် ဗိုလ်ချုပ်မှူးကြီး မင်းအောင်လှိုင်ကို ဖိတ်ကြားဖို့ ကိစ္စမှာ ဟွန်ဆန်ဘက်က ဆန္ဒရှိနေတယ်။ ဒါပေမဲ့ အာဆီယံဘုံသဘောတူညီချက် ငါးချက်ကို တိုးတက်မှုရှိအောင်လုပ်ဆောင်ပေးဖို့ လိုအပ်တယ်ဆိုတာကို သူနားလည်သဘောတူထားတယ် ” လို့ မလေးရှားဝန်ကြီးချုပ်နဲ့ ဇန်နဝါရီ ၂၅ ရက်က ဗီဒီယို Call တွေ့ဆုံဆွေးနွေးမှုမှာ ထည့်သွင်းပြောကြားထားပါတယ်။ မြန်မာဘက်ကသာ အာဆီယံဘုံသဘောတူညီချက် ငါးချက်ကို တိုးတက်ဖြစ်ထွန်းမှု မပြသနိုင်ခဲ့ရင် နိုင်ငံရေးနဲ့ မဆိုင်တဲ့ ကိုယ်စားလှယ်တစ်ဦးကိုသာ တက်ခွင့်ပေးမယ်လို့ သဘောထားရှိကြောင်းလည်း ဆိုပါတယ်။ အထူးသဖြင့် အာဆီယံနိုင်ငံအချို့က အသည်းအသန် မရမက ကန့်ကွက်နေမှုတွေဟာ သံတမန်နိုင်ငံရေးမှာ ရုပ်ထွက်မကောင်းလှတာကြောင့် ကမ္ဘောဒီးယားဘက်ကလည်း သတိထားကိုင်တွယ်နေတဲ့ သဘောမျိုးဖြစ်တယ်လို့ ဆိုနိုင်ပါတယ်။
မလေးရှားဝန်ကြီးချုပ် အစ္စမေး ဆာဘရီ ယာကော့ဗ်ကတော့ ဟွန်ဆန်နဲ့ တွေ့ဆုံဆွေးနွေးစဉ်မှာ ကမ္ဘောဒီးယားကို ကိုယ်တိုင်အလည်အပတ်လာရောက်မယ့်အကြောင်း ထည့်သွင်းပြောကြားခဲ့သလို မြန်မာကို အာဆီယံထိပ်သီးအစည်းအဝေးတက်ရောက်ခွင့်အတွက် ဆန့်ကျင်တဲ့ဘက်မှာသာ ရှိတဲ့အကြောင်း အတိအလင်းပြောကြားထားတယ်လို့ သိရပါတယ်။
#NPnews
