ပန်းရိုင်းတစ်ပွင့် ​ကြွေလွင့်ခြင်း 😞😞😞

ပန်းမြို့​တော်မှာ ပန်းတို့က ​ပေါလှသည်။ ရာသီတိုင်း ပွင့်သည့်ပန်းများရှိနေကြသလို၊ ပွင့်သမျှပန်းတိုင်းကလည်း လှကြသည်။ ယုတ်စွအဆုံး ခြံစည်းရိုး အစွန်အဖျားက ပန်းရိုင်းတို့ကပင် လှ​နေတတ်ကြသည်။ ပန်းအိုး ပန်း​ဘောင်တို့တွင် အ​ရေးတယူ ယုယစိုက်ပျိုး၍ ​မြေဆီဩဇာ ဝလင်စွာ စားသုံးခွင့်ရ​သော ပန်းတို့က လှလွန်းသည်မှာ မထူးဆန်း​သော်လည်း အ​မေ့​လျော့ခံ ခြံစွန်ခြံဖျားက ပန်းရိုင်းက​လေးများက တာဝန်​​​ကြေစွာ အလှဆင်​ပေး​နေကြသည်က​တော့ သိတတ်လျှင် ချီးမွမ်းဖွယ်​ကောင်းလှသည်။ 

ပန်းမြို့​တော်မှ အမိတက္ကသိုလ်မှာ ငယ်စဉ်အခါ ကွန်းခိုခဲ့ရစဉ်ကမူ ထိုပန်းရိုင်းတို့ကို ကြည့်မရခဲ့။ ခြံစည်းရိုး တစ်ဝိုက်မှ စိန်နားပန် နှင့် ​​နေကြာရိုင်းများကို ခဏခဏ ခုတ်ရ ရှင်းရလွန်း၍ မျက်မုန်းကျိုးခဲ့မိသည်။ အလားတူပင် ကုန်းတစ်ပြင်လုံး ​ရွှေ​ရောင်ဖုံး​အောင် ပွင့်ကြ​​လေ​သော ​အ​လေ့ကျ ​ရွှေဒင်္ဂါး marigold ပန်းများကိုလည်း အ​လေးမမူ လျစ်လျူရှုခဲ့သည်။ သူတို့က​တော့ မည်သို့ပင် အခုတ်ခံ အရှင်းခံ ရသည်ဖြစ်​စေ၊ အပစ်ပယ်ခံရသည် ဖြစ်​စေ၊ ပွင့်ချိန်တန်လျှင် ပန်းတို့ဖြင့် အလှဆင်ကြမြဲ။ တာဝန်​ကြေပွန်ကြမြဲ။ 

စင်စစ်၌ ထိုပန်းတို့သည် မလှ၍ မဟုတ်။ စိန်နားပန် ဆိုလျှင် နာမည်နှင့်လိုက်​​​အောင် အ​ရောင်အ​သွေး စုံလင် လှပ​သော​ကြောင့် ရှားပါး​သော​နေရာများ၌ ပန်းအိုးနှင့်ပျိုး​ထောင်ကာ အဖိုးကြီးမားစွာ ဂုဏ်တင်​ရောင်းချ​နေသည်ကို ​တွေ့ရသည်။ 

ယခုလည်း ညီငယ်တစ်ဦးဖြစ်သူ ကိုရဲမိုး ကွယ်လွန်သွား​ကြောင်း ကြားသိရ​သောအခါ တိုင်းပြည်အတွက် ဖြူစင်​သော စိတ်ရင်းသက်သက်ဖြင့် ကျရာ​နေရာမှ အလုပ်အ​ကျွေးပြုရင်း တာဝန်​ကြေစွာ အလှဆင်ခဲ့​သော ​မေ့​လျော့ခံပန်းရိုင်းတပွင့် ​​ကြွေလွင့်​လေပြီ ဟု ​ကြေကွဲခံစားရမိသည်။ 

သူ့ကို လူချင်းမသိခဲ့​သော်လည်း သူ့စာများမှတဆင့် သိ​နေခဲ့သည်မှာ ကြာပါပြီ။ အတင်း ဆွဲစပ်လျှင်မူ သူတို့ အပတ်စဉ် ​နောက်ဆုံးနှစ်ကာလတွင် နိုင်ငံတကာ နိုင်ငံ​ရေးနှင့်ပတ်သက်၍ ​နေ့တဝက်ခန့် သွား​ရောက်​ဟော​​ပြောပို့ချခဲ့ဖူး​သော​ကြောင့် တပည့် ​တော်သည်ဟု ဆိုလျှင်လည်း ရနိုင်​ကောင်းပါ၏။ 

လူမှုမီဒီယာနယ်ပယ်တွင် အပြိုင်အဆိုင် မုန်တိုင်းထန်​နေချိန်၌ ထူးထူးခြားခြား ထွက်​ပေါ်လာ​သော သူ့လက်ရာများကို သတိထားမိရာမှ နှစ်သက်အား​ပေးခဲ့ရသည်။ 

ဤတိုင်းပြည်တွင် နိုင်ငံနှင့်လူမျိုးကို ကိုယ်ကျိုးမဖက် သက်သက်မြတ်နိုးချစ်ခင်သူ ရှားသည်။ 

ထိုအထဲမှာမှ တပ်မ​တော်သားဘဝကို ​ရွေးချယ်၍ ​သွေး ​ချွေး အသက်နှင့်ရင်းကာ တိုင်းပြည်ကို ကာကွယ်ရန် ဆုံးဖြတ်ခဲ့သူ ပို၍ ရှားပြန်သည်။ 

တပ်မ​တော်သားဘဝမှ ကံအ​ကြောင်းမလှ၍ စွန့်ပယ်ခံရ​သော်လည်း အမိ တပ်မ​တော်အ​ပေါ် သစ္စာမဖျက် ​မေတ္တာမပျက် ဆက်လက်မြတ်နိုး အကျိုးရွက်​​ဆောင်ခဲ့သူတို့ကား ပို၍ ပို၍ ရှား​လေသည်။ 

ထိုအထဲမှပင် နိုင်ငံနှင့် တပ်မ​တော်ဘက်မှ အမုန်းခံရပ်တည်၍ ​လောကဓံကို ခါးစည်း ရင်ဆိုင်ရင်း ကိုယ့်စာရိတ် ကိုယ်စားကာ အမှန်တရားတို့ကို ရဲရဲရင့်ရင့် ​ဖော်ထုတ်ဝံ့သူတို့က ပို၍ပို၍ပို၍ ရှားပြန်၏။ 

ထိုသူများအထဲမှပင် ဝမ်းစာပြည့်ပြည့် ချက်ကျလက်ကျ ထက်ထက်မြက်မြက် ​ရေးသားနိုင်သည့် အရည်အချင်းရှိသူတို့ကား ရှာမှ ရှား​လေသည်။ 

ထိုမှတဝ နိုင်ငံအ​ရေးကြုံလျှင် တပ်မ​တော်သား မဟုတ်​​တော့သည့်တိုင် အသက်ကိုစွန့်ကာ ​ရှေ့တန်းစစ်မျက်နှာအထိ စွန့်စားသွား​ရောက် သတင်း​ထောက်၍ ပြည်သူတို့ကို သတင်းအမှန်များအား အမြန်​ပေးပို့ ဖြန့်ချိခဲ့သည့် သူ့လို ပြည်သူ့ဘက်​တော်သားမီဒီယာ စစ်သည်မျိုးကား ​မော်ကွန်းတင်​လောက်​အောင် ရှားပါဘိ၏။ 

သူလုပ်ခဲ့သမျှ အတွက်လည်း ဘာကိုမျှ သူမ​တောင်းဆိုခဲ့။ နိုင်ငံအတွက် သူ့ဘဝကို ထည့်မတွက်၊ မိသားစုအ​ရေးကို မငဲ့ကွက်၊ ​နောက်ဆုံးထွက်သက်အထိ ကိုယ်ကျိုးမဖက်ဘဲ နိုင်ငံကိုချစ်သွားခဲ့သည်။ 

သူမရှိ​တော့​သော်လည်း သူ၏ "တပ်မ​တော် ဘာလဲ၊ဘယ်လဲ" စာစုများနှင့် ​လောက်ကိုင်၊ရခိုင် အ​ရေးအခင်း ​မြေပြင်သတင်း များက သူ၏ တစ်သက်တာ အ​ပြောင်​မြောက်ဆုံး မှတ်တမ်း ​မော်ကွန်းများအဖြစ် အစဉ် ကျန်ရစ်​နေ​ပေလိမ့်မည်။ လူမှုမီဒီယာ​ပေါ်မှ သူ၏ ​ကောင်းနိုးရာရာ စာစုများကို စုစည်း၍ စာအုပ်အဖြစ် ​တွေ့မြင်ရ​သော် ​ကောင်း​လေစွဟု ချင်ခြင်းဖြစ်မိပါသည်။ သူ့ကိုချစ်​သော ပရိသတ် များအတွက်လည်း အမှတ်တရ သိမ်းဆည်းနိုင်မည် ဖြစ်သလို သူနှင့်အတူ​ ပေးဆပ်ခဲ့ရသည့် သူ့မိသားစု အတွက်လည်း ဘဝအတွက် အမှတ်တရ ဂုဏ်ယူဖွယ် ဖြစ်နိုင်လိမ့်မည် ထင်ပါသည်။ သူ့ကို ချစ်ခင်သူ စွမ်းနိုင်သူများ စဉ်းစားနိုင်ကြပါရန် ဖြစ်ပါသည်။ 

ကိုရဲမိုး ​ကောင်းရာ သုဂတိ လားပါ​စေ။  

သည်ဘဝတွင် ပန်းရိုင်းပင်ဖြစ်

ကြွေခဲ့လစ်လည်း

အသစ်ဘဝ

ဖြစ်ခဲ့ရမူ ဂုဏ်ယူဝင့်ကြွား

ပြည်ချစ်သားဟု ​မြှောက်စားချီးမြှင့်

ပွဲလယ်တင့်သည့် ကြယ်ပွင့်ဖြစ်​စေ

​တောင်းဆု​​ခြွေ၏။

#KoHlaing