မြန်မာစာသည် တို့စာ

           ကျနော် ဒီစာရေးဖို့ အတော်လေး စဥ်းစားရပါတယ် ။ ဘာလို့လဲ ဆိုတော့ ကျနော်လည်း အဂ်လိပ်စာ ညံ့သူတယောက်မို့ပါပဲ ။ 

        ဒီနေ့ ကျနော်တို့ သင်ခန်းစာတွေကို အဂ်လိပ်လို သင်နေကြရတဲ့ ရည်ရွယ်ချက်က ဘာလဲဆိုတာ ပြန်လည်သုံးသပ်သင့်ပါပြီ ။ နိုင်ငံတကာအဆင့် ပညာဆက်လက်သင်ယူကြရာမှာ အထောက်အကူ ပြုဖို့လိုအပ်တယ် ဆိုပြီး ပြောင်းလဲခဲ့တယ် ဆိုပါစို့ ။ 

          နိုင်ငံတကာ အဆင့်သို့ တက်လှမ်းနိုင်တဲ့ မြန်မာကျောင်းသား အရေအတွက်သည် တရားဝင် အစိုးရ အသိအမှတ်ပြု ထောင်ဂဏန်းမျှပင် ရှိမယ် မထင်ပါဘူး ။ 

        နှစ်စဥ် သန်းပေါင်းများစွာသော ကျောင်းသားများသည် မိမိအကျွမ်းတဝင်မရှိသော အဂ်လိပ်စာများဖြင့် ဘာသာရပ်များအား သင်ကြားနေကြရပါသဖြင့် သိသင့် သိထိုက်သော ပညာရပ်ဆိုင်ရာ အတတ်ပညာ အသိပညာများအား ကောင်းစွာ နားလည်သပေါက်ခြင်း မရှိပဲ အတန်းတွေ ကြီးလာကြရပါတယ် ။ 

        ကျနော့်ကိုယ်တွေ့ ပြောရရင်တော့ ကျနော်သည် ၈ တန်းကျောင်းသားအထိ သချ်ာဘာသာရပ်မှာ ဖြေဆိုတိုင်း ၁၀၀ အပြည့်ရရှိပြီး အလွန်အမှတ်နည်းပါက ၉၇ မှတ် ရပါတယ် ။ သို့သော် အဂ်လိပ်လို သင်ကြားရသော နှစ်မှစပြီး အမှတ် ၄၀ ကျော်သာ မနည်းရအောင် ဖြေဆိုနိုင်ပါတော့တယ် ။ 

       သချ်ာမေးခွန်းရဲ့ အဓိကကျတဲ့ အဖြေမှန်ဖော်ထုတ်ရေးထက် ဘာမေးထားသလဲဆိုတာကို သဘောမပေါက်လို့ပါပဲ ။ ဒါကတော့ ကျနော့်ကိုယ်တွေ့ အခက်အခဲပါပဲ ၊ ကျနော်ကဲ့သို့သော ကျောင်းသားပေါင်း သန်းပေါင်းများစွာ နှစ်စဥ် ရှိနေလိမ့်မယ်ဆိုတာလည်း သေချာပါတယ် ။ 

        ဒါဆို နိုင်ငံတကာနဲ့ယှဥ်ရင် ဘယ်နှယ့်လုပ်မလဲ မေးလာဖွယ်ရှိပါတယ် ။ ဟုတ်ကဲ့ နိုင်ငံတကာအဆင့် တက်လှမ်းမယ့် ထူးချွန်ကလေး အနည်းစု (0.01)% အတွက် မပူပါနဲ့ ထူးချွန်သူများဖြစ်လို့ အဂ်လိပ်စာ အထူးပြု တနှစ်သင်ပေးရင် သူတို့ တန်းမှီလမ်းမှီ ကျွမ်းကြင်သွားကြမှာပါ ။

         ကျနော်တို့ တိုင်းပြည်မှာ ကိုယ်ပိုင် အဆင့်မြင့် ဗျည်း ၊ သရ အက္ခရာတွေ ရှိပါတယ် ။ နောက်ပြီး ဒီ မြန်မာစာကလည်း အရေးပါတဲ့ ရုံးသုံးစာအဖြစ် သတ်မှတ်ထားပါတယ် ။ ဘာကြောင့် မြန်မာစာကို ပညာရေးဌာနကနေ ဖယ်ထုတ်လို့ ရသရွေ့ ဖယ်ထုတ်နေကြတာလည်း တွေးမရပါဘူး ။ 

        အဂ်လိပ်စာ အရည်အသွေး တက်လာချင်ရင် လွယ်ပါတယ် ။ အစိုးရကျောင်းတွေမှာ အရေး အဖတ် နဲ့ လမ်းဆုံးမနေပဲနဲ့ အပြော နဲ့ နားထောင်စွမ်းရည် တိုးတက်ရေးအတွက် အချိန်ပေး သင်ကြားရင် လက်တွေ့ အသုံးချ အဂ်လိပ်ဘာသာရပ်အဖြစ် တွေ့မြင်နိုင်ပါလိမ့်မယ် ။ 

      ကျနော်တို့ တိုင်းပြည်ဟာ ဘာစကား နဲ့ စာပေပါ ကျူးကျော်ခံနေရပါပြီ ။ လေ့လာကြည့်ပါ မြန်မာနိုင်ငံမှာ မြန်မာအများစု နားမလည်တဲ့ တရုတ်စာ အဂ်လိပ်စာ ဆိုင်းပုဒ်တွေ ကြော်ငြာတွေ များနေပါပြီ ။ ဆိုင်းပုဒ် နဲ့ ကြော်ငြာများအား မြန်မာစာနှင့် ပူးတွဲ ကြော်ငြာရမယ်လို့ ဥပဒေထုတ်ရပါတော့မယ် ။  

          ဒီထက်ဆိုးတာ ရှိပါသေးတယ် ။ ပညာရေးဌာနသည် ကျောင်းသူ ကျောင်းသားတွေရဲ့ လေ့လာသင်ယူနိုင်စွမ်းအတွက် ယုတ်လျှော့စေတဲ့ သင်ခန်းစာများအား အဂ်လိပ်လို ပြဌာန်းထားရုံမျှမကပါဘူး ။ 

        ငွေကုန်ကြေးကျများစွာ အကုန်ခံပြီး လုပ်နေတဲ့ ပညာရေးဆိုင်ရာ ဝပ်ရှော့များမှာ သူတို့ကိုယ်တိုင် နားမလည်တဲ့ အဂ်လိပ်လို ရေးသားထားတာတွေပဲ လျှောက်ပြောနေကြပါတယ် ။ 

           အဲဒီ ဝပ်ရှော့မှာ တက်ရောက်တဲ့ သူတွေကို ပြန်မေးကြည့် 90 % က လုံးစေ့ ပတ်စေ့ နားမလည်ကြပါဘူး ။ ဟန်ဆောင် ဖြီးဖြန်းနေကြတာများပါတယ် ။ 

မင်း မတတ်တိုင်း မနာလိုစိတ်နဲ့ ဝေဖန်တာလားလို့ မေးချင်ရင်တော့ ခင်ဗျားတို့ကိုယ်တိုင် အဲလို ပွဲတွေ သွားပြီး အင်တာဗျူးကြည့်ကြပါ ၊ အံ့သြလွန်းလို့ သေသွားနိုင်လိမ့်မယ် ။ 

          နောက်ထပ် ထင်ရှားတဲ့ဥပမာရှိသေးတယ် ။ ပညာရေးဌာနက ထုတ်ဝေနေတဲ့ သုတေသနဂျာနယ် (Research Journa) စာအုပ်ကို အဂ်လိပ်လိုပဲ ရေးသားထုတ်ဝေထားပါတယ် ။ ကျနော်စိန်ခေါ်ဝံ့ပါတယ် အဲဒီ မဂ္ဂဇင်းစာအုပ်ကို တက္ကသိုလ်က ဆရာအားလုံးတောင် နားမလည်ပါဘူး ဆိုတဲ့ အချက်ကိုပါ ။ 

 - ဘာလို့ လူတိုင်းနားလည်အောင် မြန်မာစာနဲ့ မထုတ်ဝေတာရတာလဲ.. ?

- အဂ်လိပ်လို ထုတ်ဝေမှ လူအထင်ကြီးတာလို့ ယူဆနေပါသလာ..?

- မြန်မာစာ ဝေါဟာရတွေ နုံနဲဆင်းရဲနေလွန်းတယ်လို့ အထင်သေးနေကြတာလား.. ?

         ဒါတွေက ကျနော်ရဲ့ မြန်မာစာပေ အပေါ် ကျူးကျော်ခံနေရတဲ့ ခိုင်မာတဲ့ အချက်တွေပါပဲ ။ တရားခံကတော့ ပညာရေးဝန်ကြီးဌာနက အခြေခံဇစ်မြစ်ဖြစ်နေတာ တွေ့ရပါ့မယ် ။ လူအထင်ကြီးခံရအောင် လုပ်နေတဲ့ ပညာရေးထက် လူအသုံးချခံပညာရေး ၊ အသုံးတည့်ပညာရေး စနစ်သို့ ဦးတည်သင့်ပါပြီ ။ 

. ဒီဝေဖန်ချက်တွေ မှန် မမှန်ကတော့ မြန်မာ ဘွဲ့ရတယောက်ကို နီပေါလ်နိုင်ငံသား လေးတန်းအောင်အဆင့် နဲ့ အဂ်လိပ်စကား ယှဥ်ပြီး ပြောခိုင်းကြည့်လိုက်ပါ ။ မြန်မာ့ပညာရေး ဘယ်လောက် စုတ်ပြတ် သုံးစားမရတော့ဘူးဆိုတာ သိလာပါလိမ့်မယ် ။ 

           နောက် နိုင်ငံရေးသမားတွေလို အနုပညာရှင်တွေလို စာရေးဆရာများလို လူထုနဲ့ ထိတွေဆက်ဆံ ပြောဆိုနေသူများလည်း လူအများနဲ့ ပြောဆိုရာမှာ အဂ်လိပ်လို ညှပ်ပြောတာမျိုး ရှောင်ရှားသင့်ပါတယ် ။ ဒါက ဘာသာစကား ကျူးကျော်ခံရတာပါ ။ 

         အနှစ်ချုပ်ပြောရမယ် ဆိုရင် ယခု ကျူး​ကျော်ခြင်း ခံနေရသော မြန်မာစကား နဲ့ မြန်မာစာပေ အတွက် လက်တွေ့သုံးစားမရသော ပညာရေးစနစ်အား အလျှငိအမြန် ပြုပြင်သင့်နေပါပြီလို့ ယူဆပါတယ် ။ 

           တတ်ဟန်ဆောင် ပညာရေးအစား လက်တွေ့ အသုံးချ ပညာရေးစနစ်သို့ ကူးပြောင်းနိုင်ပါစေ..........

          ကိုရွှေမျိုးဝင်း

(ကျနော်တို့ တိုင်းပြည်မှာ ဒီလိုလူတွေ လုပ်ပိုင်ခွင့် ရနေသရွှေ့တော့ တိုးတက်ဖို့ လမ်းမမြင်ပါဘူး.....)