ဒီဇင်ဘာ(၆)ရက်နေ့တွင် ၅၀၅(ခ)အမှု အပြီးသတ်အမိန့်ချသောအခါ ထောင်ဒဏ်အပြစ်ပေးခံရပါလျှင် ဒေါ်အောင်ဆန်းစုကြည်သည် အကျဉ်းသားအဖြစ် ရောက်ရှိပါမည်။
ဒေါ်အောင်ဆန်းစုကြည်သည် အကျဉ်းသားဖြစ်လျှင် ဥပဒေနှင့်အညီ အကျဉ်းထောင်သို့ အပို့ခံရပါမည်။အကျဥ်းသားသည် အပြင်တရားရုံးထုတ်လျှင် ဥပဒေနှင့်အညီ သံခြေကျင်းခတ်ခံရပါမည်။
မိုက်ကယ်ကျော်မြင့်ကို ဒေါ်အောင်ဆန်းစုကြည်အစိုးရက ၅၀၅(ခ)ဖြင့်စွဲပြီး ထောင်ဒဏ်အပြစ်ပေးခဲ့သည်။ထောင်ဒဏ်အပြစ်ပေးပြီး နောက်တစ်မှုထပ်စွဲပြန်သည်။မိုက်ကယ်ကျော်မြင့် ရုံးချိန်းသွားတိုင်း သံခြေကျင်းခတ်ခံရသည်။ဒါကိုမြင်တွေ့ပြီး ကျွန်တော်အလွန်စိတ်ထိခိုက်ခဲ့ရသည်။
ကျွန်တော့်ကို သာယာဝတီထောင်သို့ ပြောင်းသောအခါကလည်း ခြေကျင်းခတ်ခံရသည်။သာယာဝတီထောင်ထဲရောက်ပြီး လေးနာရီလောက်ကြာသည်အထိ ခြေကျင်းမဖြုတ်ပေးပါ။ခြေကျင်းဖြုတ်ပေးရန်ပြောသဖြင့် ခေါင်းအရိုက်ခံရသည်။
ဒီမိုကရေစီပါတီဖြစ်သည်ဟုဆိုသော NLDပါတီအစိုးရလက်ထက်တွင် နိုင်ငံရေးပြစ်မှုဖြင့် အကျဉ်းကျသူများကို သက်ညှာစွာဆက်ဆံရန် ေဒါ်အောင်ဆန်းစုကြည် ညွန်ကြားခြင်းမပြုခဲ့ပါ။ထောင်အာဏာပိုင် ဖရဲသီးများကလည်း လည်မျိုညှစ်ခြင်း ခေါင်းရိုက်ခြင်းကဲ့သို့ သေနိုင်လောက်သည့် နှိပ်စက်မှုများ ကျွန်တော်ငါးမင်းဆွေအပေါ် ပြုလုပ်ခဲ့ကြသည်။
ဒေါ်အောင်ဆန်းစုကြည် နိုင်ငံရေးအကျဉ်းသားဘဝရောက်ခဲ့ပါလျှင် အစိုးရအကြီးအကဲ ဗိုလ်ချုပ်မှူးကြီးမင်းအောင်လှိုင်သည် ဒေါ်အောင်ဆန်းစုကြည် အပြင်တရားရုံးထုတ်သောအခါ သံခြေကျင်းခတ်မည်ဟု ကျွန်တော်မထင်ပါ။ချစ်ခြင်းမေတ္တာဖြင့် အရာရာကို အကောင်းအတိုင်း ဖြစ်စေပါမည်။
ငါးမင်းဆွေ
၄-၁၂-၂၀၂၁
