ကျနော်ရေးနေသမျှထဲမှာ ဥပဒေဖောက်ဖျက်တဲ့ သူတွေကို အားပေး ကာကွယ် ရေးသားနေတာ တခါမျှ မရှိခဲ့ပါဖူး ။ ဒါပေမယ့် ဒီနေ့ အကူအညီတောင်းလာတဲ့ ပြဿနာကိုတော့ ရေးသင့်တယ် ထင်လို့ ရေးလိုက်ပါတယ် ။
လှိုင်သာယာအဝေးပြေး နယ်မြေမှာ ကျူး ရာဂဏန်း နီးပါးရှိပါတယ် ။ ဖြိုးမင်းသိန်းလက်ထက်မှာ ကျူးပါမစ် စလစ် ရပြီးသားမိသားစုတွေ ဖြစ်ပါတယ် ။
ဟိုတလောတုန်းက ကုမ္ပဏီ နဲ့ လှိုင်သာယာလူမိုက်တွေ ပေါင်းပြီးတော့ အိမ်တွေဖျက်ပေးဖို့ ခြိမ်းခြောက်ကြတယ် ။ နေစရာ မရှိတဲ့ သူတွေက အစားပေးမှာလား မေးတော့လည်း မပေးဘူး တဲ့ ။
စမတ်ကဒ် ရထားတော့ သူတို့ကလည်း အစားမရရင် မဖျက်နဲ့ ဖယ်မပေးဖူးနိုင်ဖူး ဆိုတော့ ပြီးသွားခဲ့တယ် ။
အဲဒါ အခု ထပ်လာတယ် ။ ရပ်ကွက်ရုံးကို ခေါ်ပြီး လက်မှတ်ထိုးခိုင်းတယ် ။ ငါးသိန်းပေးမယ်လို့ ညှိကြတယ် ။ ဖျက်မပေးရင် ဘူဒိုဇာ နဲ့ ထိုးမယ်ဆိုပြီး လုပ်ဆောင်နေကြတယ် ။
ဒီတခါ ထူးခြားတာက ရက့ကွက်ရုံးမှာ လူမိုက်တွေတင် မကဖူး တပ်မတော်သား ၅ ယောက်ပါ ရှိနေတယ် ။ ဒီတော့ ကျူးမိသားစုတွေ စစ်တပ်ကို ကြောက်လို့ ဘာလုပ်မှန်း မသိ ဖြစ်နေပြီး တငိုငို တရီရီ ဖြစ်နေကြပြီ ။
ကောင်းပြီ ကျူးကို ရှင်းတာ ဥပဒေ အရ မှန်ပါတယ် ။ သို့သော် အခြေအနေ အချိန်အခါ ဆိုတာကို တွက်ဆကြည့်ရပါ့မယ် ။
နစက အနေနဲ့ တိုင်းပြည် တည်ငြိမ်အောင် မလုပ်နိုင်သေးဘူး ။ ဒါက အရှိတရားပဲ ငြင်းမနေကြပါနဲ့ ။ အဲဒါကို အခု စည်ပင် နဲ့ တပ်က ဖျက်ရမယ်ဆိုပြီး ဇွတ်ပြောနေတဲ့ လှိုင်သာယာ ကျူးကိစ္စ က အကျိုးဆက် ဘာတွေ ရနိုင်မလဲ ။
လုပ်ရမယ့် လုပ်ငန်းစဉ်တွေ အသာထားအုံး ၊ သပိတ်ပေါင်းစုံ ဗုံးပေါင်းစုံ သေနတ်ပေါင်းစုံ တွေ နဲ့ ရှုတ်ရှက်ခတ်နေတဲ့ ကြားထဲက ကြောက်စရာ COVID က တကြော့ပြန်လာနေတဲ့ အချိန်....
ဒီမိသားစုတွေ ဘယ်မှာ ခိုကပ်နေလို့ ရနိုင်မလဲ ။ ဖြစ်နေတာက မြန်မာပြည်မှာ သူ့ကိုယ်မယုံ ကိုယ့်သူမယုံ ဖြစ်နေတာလေ ။
သူတို့ဘာသာ နီ နီ စိမ်း စိမ်း ဒီအချိန်မှာ ဒီလို ဟာတွေ မလုပ်ထိုက်ပါဖူး ။ မြေနိမ့်ရာ လှံစိုက်လုပ်နေကြတာ အောက်ခြေ စည်ပင် နဲ့ နယ်ခံ တပ်မှူးက လုပ်နေကြတာလား ။
ဒီအချိန်မှာ နစက အဆင့်ကတော့ ဒါတွေ လုပ်လောက်အောင် မိုက်မဲမယ် မထင်ပါဘူး ။ သူတို့တောင် မကြာမကြာ သွားပြီး လှူဒါန်းနေကြတာလေ ။
နောက်ပြီး စစ်သား နဲ့ စည်ပင်က ရပ်ကွက်ရုံးထဲမှာ ကုမ္ပဏီက မွေးထားတဲ့ လူမိုက်တွေ နဲ့ ဘာကြောင့် အတူရှိနေကြတာလဲ... ?
တပ်မှူးနဲ့ စည်ပင် ငွေစားပြီး ပူးပေါင်း လုပ်နေပြတာလား မေးစရာဖြစ်နေပါပြီ ။
နစက အနေနဲ့ ကိုယ့်တိုင်းရင်းသား ဆင်းရဲသားတွေ အပေါ် ဒီအချိန်မျိုးမှာ ကာကွယ်ပေးရမှာပါ ။ နစက ကို နာမည်ဖျက်ချင်တဲ့ ဝန်ထမ်းတွေ အများကြီး ရှိနေပါတယ် ။ အထက်လူကြီးများ ဒီကိစ္စကို စီစစ်ပြီး ဆောင်ရွက်ပေးဖို့ အရေးတကြီး လိုအပ်နေပါပြီ ။
ကျူးကိစ္စအား ကျနော်အားမပေးပါဖူး ။ သို့သော် ယခုလို ကပ်ပေါင်းစုံ သင့်နေချိန်မှာ နိုင်ငံတော် လူကြီးမင်းများ မှန်ကန်စွာ ဆုံးဖြတ်စေချင်လို့ တင်ပြလိုက်ရပါတယ် ။ နိုင်ငံတော် က လမ်းညွှန်မှု မပေးပဲ အောက်ခြေမှ လုပ်ချင်တိုင်း လုပ်နေတာဆိုရင်လည်း အချိန်မှီ ထိမ်းထိမ်းသိမ်းသိမ်း ဆောင်ရွက်စေချင်ပါတယ် ။
မျိုးဝင်း
(မိုးလရာသီ ကပ်ရောဂါ ဘေး နဲ့ ဒီလူတွေ ဘယ်မှာ ခိုလှုံကြရပါ့မလဲ)
Crd. ....
